غازي الذيبة

إلنا الجبل

إلنا الصدى والواد

إلنا المدى ممدود ع قد الأمل 

إلنا نشيد الحب والميلاد

إلنا صبا لكروم والأعياد

والريح والميات والنسمة 

إلنا على كف النهر 

صوت النهر والناي والنغمة 

..

إلنا الشمس والضو

مسترخي عَ أرض الله 

يمشي على مهلو 

..

إحنا على جباه الشمس أحرار 

زعتر، حبق، ريحان مع نوار

والنا نهار 

زفة عريس مورد الخدين بالأزهار

..

واحنا الحمى .. إلنا السما 

إلنا عريشتنا 

..

كل ما هجم ع الضو صوت الناي

إلنا فرح لِتراب يا حنة

..

إلنا أغانينا وصوت الهوى الولهان 

إلنا حدود الريح والميدان 

وإلنا النجم ع كتفنا سهران 

..

هذي الأغاني يا ربعنا إلنا 

وهذا المطر يا غيم ساكِنا 

وهذا الحلم دلى عناقيده تَ يحملنا 

وهذا الوطن يا ميجنا إلنا.